輕輕的心跳
《輕輕的心跳》Khin-khin ê Sim-thiàu
王茉聿Ông Bua̍t-u̍t
——————————————
一工閣過一工
tsi̍t-kang koh kuè tsi̍t-kang
沓沓仔感受你的愛
ta̍uh-ta̍uh-á kám-siū lí ê ài
你的笑容
lí ê tshiò-iông
是我上媠的期待
sī guá siōng suí ê kî-thāi
一暝閣過一暝
tsi̍t-mî koh kuè tsi̍t-mî
慢慢仔看著你大漢
bān-bān-á khuànn-tio̍h lí tuā-hàn
你的出現
lí ê tshut-hiān
是天上好的安排
sī thinn siōng-hó ê an-pâi
伸手抱著你
tshun-tshiú phō tio̍h lí
來探索這个世界
lâi thàm-soh tsit ê sè-kài
透過你的眼光
thàu-kuè lí ê gán-kong
重新編織未來
tiông-sin pian-tsit bī-lâi
聽著你輕輕的心跳
thiann-tio̍h lí khin-khin ê sim-thiàu
我就有大大的力量
guá tiō ū tuā-tuā ê li̍k-liōng
每一聲
muí tsi̍t-siann
攏予我勇敢堅強
lóng hōo guá ióng-kám kian-kiông
聽著你輕輕的心跳
thiann-tio̍h lí khin-khin ê sim-thiàu
看著你古錐的面容
khuànn-tio̍h lí kóo-tsui ê bīn-iông
你欲去的所在
lí beh khì ê sóo-tsāi
就是我的方向
tiō-sī guá ê hong-hiòng
—
拄出世的天星
tú tshut-sì ê thinn-tshinn
我性命新的意義
guá sìnn-miā sin ê ì-gī
準備好陪你
tsún-pī hó puê lí
面對每一个四季
bīn-tuì muí tsi̍t-ê sù-kuì
