母親啊!我的母親
《母親啊!我的母親》Bú-tshin–ah! Guá ê Bú-tshin
王禎妃Ông Tsing-hui
臺灣合唱團Tâi-uân Ha̍p-tshiùnn-thuân
——————————————
母親啊!我的母親
bú-tshin–ah! guá ê bú-tshin
我心所數念的母親
guá sim sóo siàu-liām ê bú-tshin
你養飼阮
lí ióng-tshī gún
你照顧阮
lí tsiàu-kòo gún
自細漢晟阮變大人
tsū sè-hàn tshiânn gún piàn tuā-lâng
你的辛勞有啥人知
lí ê sin-lô ū siánn-lâng tsai
你傷心的目屎
lí siong-sim ê ba̍k-sái
毋知流偌濟
m̄-tsai lâu guā-tsē
佇這現實的世界
tī tse hiān-si̍t ê sè-kài
一切攏會變
it-tshè lóng ē piàn
只有你對阮的愛
tsí-ū lí tuì gún ê ài
永遠永遠攏袂變
íng-uán íng-uán lóng buē piàn
母親啊!我的母親
bú-tshin–ah! guá ê bú-tshin
你教示阮
lí kà sī gún
人生是一條坎坷的道路
jîn-sing sī tsi̍t-tiâu khám-khia̍t ê tō-lōo
你苦勸阮
lí khóo-khǹg gún
千萬毋通失志
tshian-bān m̄-thang sit-tsì
也毋免怨嘆
iā m̄-bián uàn-thàn
只有忍耐
tsí-ū jím-nāi
勇敢步步向前行欸
ióng-kám pōo-pōo hiòng-tsiân kiânn–eh
一枝草一點露
tsi̍t-ki tsháu tsi̍t-tiám lōo
總有一工
tsóng ū tsi̍t-kang
嘛會出頭天
mā ē tshut-thâu-thinn
—
母親啊!我的母親
bú-tshin–ah! guá ê bú-tshin
母親啊!永遠的母親
bú-tshin–ah! íng-uán ê bú-tshin
