修理車
《修理車》siu-lí tshia
Funkymo
——————————————
2005年的米奶
nn̄g-tshing khòng-gōo nî ê bí-ling
講老嘛毋是足老
kóng lāu mā m̄-sī tsiok lāu
265匹的馬力
nn̄g-pah la̍k-tsa̍p-gōo phit ê bé-la̍t
對擋恬到100
uì tòng-tām kàu tsi̍t-pah
只要六秒鐘
tsí-iàu la̍k bió-tsing
手排的ミッション
tshiú-pâi ê mi-sióng
𤆬我四界走賴賴趖
tshuā guá sì-kè tsáu luā-luā sô
但是哩哩硞硞的問題
tān-sī lih-lih-khok-khok ê būn-tê
總在不時來攪擾
tsóng tsāi put-sî lâi kiáu-jiáu
修理車
siu-lí tshia
修理你
siu-lí lí
修理玻璃
siu-lí po-lê
修理紗窗
siu-lí sua-thang
修理紗門
siu-lí sua-mn̂g
修理咱的愛情
siu-lí lán ê ài-tsîng
修理到ドライバ摃著頭殼
siu-lí kàu loo-lài-bah kòng-tio̍h thâu-khak
修理到螺絲捘到崩牙
siu-lí kàu lôo-si tsūn kàu pang-gâ
若為著予你加活一冬
nā uī-tio̍h hōo lí ke ua̍h tsi̍t-tang
我甘願為你去舞廳褪衫
guá kam-guān uī lí khì bú-thiann thǹg-sann
修理車
siu-lí tshia
修理你
siu-lí lí
為著你
uī-tio̍h lí
我家己去學噴漆
guá ka-kī khì o̍h phùn-tshat
看著逐家攏買新車
khuànn-tio̍h ta̍k-ke lóng bué sin-tshia
我只要你陪我春夏秋冬
guá tsí-iàu lí puê guá tshun-hā tshiu-tang
外口日頭赤焱焱
guā-kháu ji̍t-thâu tshiah iānn-iānn
你選擇今仔日風櫃歹去
lí suán-ti̍k kin-á-ji̍t hong-kuī pháinn–khì
冷吱吱的落雨天
líng ki-ki ê lo̍h-hōo thinn
你的窗仔門煞袂關
lí ê thang-á-mn̂g suah buē kuainn
𤆬你去洗一个清氣
tshuā lí khì sé tsi̍t-ê tshing-khì
煞漏水漏甲規塗跤
suah lāu-tsuí lāu kah kui thôo-kha
但只要牽著你的ハンドル
nā tsí-iàu khan tio̍h lí ê ha̋n-tóo-luh
我就感覺真心適
guá tō kám-kak tsin sim-sik
—
我上驚物件歹去
guá siōng kiann mi̍h-kiānn pháinn–khì
叫無零件
kiò bô lîng-kiānn
我上驚載著阮媽媽
guá siōng kiann tsài tio̍h gún má-ah
予伊嫌甲流瀾
hōo i hiâm kah lâu-nuā
講你傷過風神
kóng lí siunn-kè hong-sîn
是歹囝的車
sī pháinn-kiánn ê tshia
但伊毋知影
nā i m̄ tsai-iánn
你是我心肝
lí sī guá sim-kuann
