眾神護泉州
《眾神護泉州》Tsiòng-sîn Hōo Tsuân-tsiu
蘇世洪Soo Sè-hông(泉州南安康美)
——————————————
南國幾多秋
lâm-kok kí-to tshiu
青山水長流
tshing-san tsuí tiông liû
舉頭三尺敬
kí-thiô sann-tshioh kìng
眾神護泉州
tsiòng-sîn hōo Tsuân-tsiu
–
大大細細的宮
tuā-tuā-suè-suè ê king
保庇四方的神明
pó-pì sìr-hong ê sên-bîng
善良不拜無妨
siān-liông put pài bû-hông
歹心傾誠何益
phái-sim khing sîng hô ik
怹是世間人
en sī sè-kan-lâng
佇世間保安寧
tī sè-kan pó an-lîng
道德流傳人間
tō-tik liû-tuân lên-kan
才有神仙之名
tsiah ū sên-sian tsi bîng
護泉州的眾神明
hōo Tsuân-tsiu ê tsiòng sîn-bîng
是咱祖先的化身
sī lán tsóo-sian ê huà-sen
千年不斷的香火
tshian-liân put-tuān ê hiunn-hé
敬著仁義禮智信
kìng tio̍h lên gī lé tì sèn
護泉州的眾神明
hōo Tsuân-tsiu ê tsiòng sîn-bîng
照咱家己的良心
tsiò lán kai-kī ê liông-sim
舉頭三尺有教示
kí-thiô sann-tshioh ū kà-sī
子子孫孫永寶用
tsír-tsír-sun-sun íng pó īng
青山水長流
tshing-san tsuí tiông liû
眾神護泉州
tsiòng-sîn hōo Tsuân-tsiu
青山水長流
tshing-san tsuí tiông liû
眾神護泉州
tsiòng-sîn hōo Tsuân-tsiu
—
眾神護泉州
tsiòng-sîn hōo Tsuân-tsiu
