世遺泉州
《世遺泉州》Sè-uî Tsuân-tsiu
蘇世洪Soo Sè-hông(泉州南安康美)
——————————————
雙槳佇手中搖啊搖
sang-tsiúnn tī tshiú-tiong iô–ah iô
船行到古城的順濟橋
tsûn kiânn kàu kóo-siânn ê Sūn-tsè-kiô
德濟門可惜衹賰地基石
Tik-tsè-mn̂g khó-sioh tsí tshun tē-ki tsio̍h
天后宮去摸米龜的人袂少
Thian-hiō-king khì boo bí-ku ê lâng buē-tsió
清淨寺是波斯風格的建築
Tshing-tsīng-sīr sī Pho-sir hong-keh ê kiàn-tio̍k
伊的正手爿
i ê tsiànn-tshiú-pîng
是咱拜孔子的府文廟
sī lán pài Khong-tsír ê Hú-bûn-biō
南外宗正司
Lâm-guā-tsong-tsìng-sir
以前徛皇族
í-tsuînn khiā hông-tso̍k
市舶司管理著海上的外貿
Tshī-pi̍k-sir kuán-lí tio̍h hái-siōng ê guā-biō
塗跤是席天是被
thôo-kha sī tshio̍h thinn sī phē
開元寺的鴿仔怹四界飛
Khai-guân-sīr ê kap-á en sì-kuè pe
拳頭燒酒曲攏無問題
kûn-thâu sio-tsiú-khik lóng bô-būn-tuê
逐日鬧熱是頭到尾
ta̍k-le̍t lāu-lia̍t sī thâu kàu-bé
雙槳佇手中搖啊搖
sang-tsiúnn tī tshiú-tiong iô–ah iô
船行到江口碼頭去走踖
tsûn kiânn kàu Kang-kháu Bé-thâu khì tsáu-tso̍h
吞海彼兩字無開玩笑
thun-hái hit nn̄g-lī bô khai uán-tshiò
鎮海的寶地是真武廟
tèn-hái ê pó-tē sī Tsen-bú-biō
塗跤是席天是被
thôo-kha sī tshio̍h thinn sī phē
靈山聖墓是誠大塊
Lîng-san Sìng-bōo sī tsiânn tuā-tè
老君佇咧山中坐
Nóo-kun tī-leh suann-tiong tsē
這款風水嘛無地揣
tsit khuán hong-suí mā bô-tè tshē
雙槳佇手中搖啊搖
sang-tsiúnn tī tshiú-tiong iô–ah iô
船行到千年的洛陽橋
tsûn kiânn kàu tshuinn-nî ê Lo̍h-iûnn-kiô
出海祈風文章刻在石
tshut-hái kî hong bûn-tsiong khik tsāi tsio̍h
永遠佇九日山的半山腰
íng-uán tī Kiú-le̍t-san ê puànn-suann-io
塗跤是席天是被
thôo-kha sī tshio̍h thinn sī phē
摩尼光佛草庵坐蓮花
Môo-nî-kong-Hu̍t tsháu-am tsē lián-hue
石湖港的大船真正濟
Tsio̍h-ôo-káng ê tuā-tsûn tsin-tsiànn tsuē
六勝塔萬壽塔誠好揣
Lio̍k-sìng-thah Bān-siū-thah tsiânn hó tshē
塗跤是席天是被
thôo-kha sī tshio̍h thinn sī phē
燒瓷煉鐵將生理做
sio-huî liān-thih tsiong sing-lí tsuè
金門好酒閣乾一杯
Kim-mn̂g hó-tsiú koh kan tsi̍t-pue
行咧安平橋來講情話
kiânn leh An-pîng-kiô lâi káng tsîng-uē
塗跤是席天是被
thôo-kha sī tshio̍h thinn sī phē
一半仙境一半人間煙火
tsi̍t-puànn sian-kíng tsi̍t-puànn lên-kan ian-hé
若是暗頭講天掠皇帝
nā sī àm-thâu káng thinn lia̍h hông-tè
我來唱歌你來泡茶
guá lâi tshiùnn-kua lí lâi phàu-tê
塗跤是席天是被
thôo-kha sī tshio̍h thinn sī phē
一半古早一半現代的土地
tsi̍t-puànn kóo-tsá tsi̍t-puànn hiān-tāi ê thóo-tuē
遮的故事是真正濟
tsia-ê kòo-sī sī tsin-tsiànn tsuē
三暝三日也講袂澈
sann-mî sann-le̍t iā káng buē-thiat
趕緊來泉州我共你說
kuán lâi Tsuân-tsiu guá kāng lí seh
趕緊來泉州我共你說
kuán lâi Tsuân-tsiu guá kāng lí seh
