某
《某》Bóo
陳添福Tân Thiam-hok
——————————————
你敢會想起
lí kám ē siūnn-khí
天涯海角的石頭邊
thian-gâi hái-kak ê tsio̍h-thâu pinn
福氣的我
hok-khì ê guá
拄著賢慧聰明的你
tú-tio̍h hiân-huē tshong-bîng ê lí
你敢有聽見
lí kám ū thiann-kìnn
阮對菩薩講的心意
gún tuì phôo-sat kóng ê sim-ì
絚絚牽你的手
ân-ân khan lí ê tshiú
永遠袂放開
íng-uán buē hòng-khui
每一工的彼杯水
muí tsi̍t-kang ê hit pue tsuí
欲永遠為你斟
beh íng-uán uī lí thîn
嘛會好好拍拚趁大錢
mā ē hó-hó phah-piànn thàn-tuā-tsînn
來予你過好日子
lâi hōo lí kuè hó ji̍t-tsí
你是我一生最愛的某
lí sī guá it-sing tsuè ài ê bóo
咱的這个家
lán ê tsit ê ke
攏是你咧照顧
lóng-sī lí teh tsiàu-kòo
少年的我
siàu-liân ê guá
無好頭路
bô hó thâu-lōo
定定予你為我食苦
tiānn-tiānn hōo lí uī guá tsia̍h-khóo
我一定欲成功
guá it-tīng beh sîng-kong
為你遮風擋雨
uī lí tsia-hong tòng-hōo
你是我一生最愛的某
lí sī guá it-sing tsuè ài ê bóo
這馬的幸福
tsit-má ê hīng-hok
攏是你的功勞
lóng-sī lí ê kong-lô
有一工我若變糊塗
ū-tsi̍t-kang guá nā piàn hôo-tôo
三頓袂食袂行路
sann-tǹg bē tsia̍h buē kiânn-lōo
心內放袂離
sim-lāi pàng buē-lī
是你這个某
sī lí tsit ê bóo
—
你是我一生最愛的某
lí sī guá it-sing tsuè ài ê bóo
只要你幸福
tsí-iàu lí hīng-hok
我一定袂讓步
guá it-tīng buē niū-pōo
有一工我若變糊塗
ū-tsi̍t-kang guá nā piàn hôo-tôo
三頓袂食袂行路
sann-tǹg buē tsia̍h buē kiânn-lōo
心內放袂離
sim-lāi pàng buē-lī
是你這个某
sī lí tsit ê bóo
有一工我會變糊塗
ū-tsi̍t-kang guá ē piàn hôo-tôo
三頓袂食袂行路
sann-tǹg buē tsia̍h buē kiânn-lōo
最後的向望
tsuè-āu ê ǹg-bāng
有人替我予你倚靠
ū-lâng thè guá hōo lí uá-khò
