戶橂
《戶橂》Hōo-tīng
陳怡婷Tân Î-tîng
——————————————
自阮來踏入恁兜的戶橂
tsū gún lâi ta̍h-ji̍p lín tau ê hōo-tīng
做你的牽手
tsuè lí ê khan-tshiú
維持這个家庭
î-tshî tsit ê ka-tîng
毋管日時暗暝抑黃昏
m̄-kuán ji̍t–sî àm-mî ia̍h hông-hun
無時無陣
bô-sî-bô-tīn
拑家來拍算
khînn-ke lâi phah-sǹg
愛你
ài lí
阮才踏入恁兜的戶橂
gún tsiah ta̍h-ji̍p lín tau ê hōo-tīng
做著咱的岫
tsuè tio̍h lán ê siū
啥物攏愛吞忍
siánn-mih lóng ài thun-lún
無論大細食飽的三頓
bô-lūn tuā-sè tsia̍h-pá ê sann-tǹg
掩來扯去勤儉顧根本
am-lâi-tshé-khì khîn-khiām kòo kin-pún
戶橂矮矮三寸懸
hōo-tīng é-é sann-tshùn kuân
若入門
nā ji̍p-mn̂g
鹹汫攏愛知輕重
kiâm-tsiánn lóng ài tsai-khin-tāng
只有你會當來成全
tsí-ū lí ē-tàng lâi sîng-tsuân
成全阮的性命
sîng-tsuân gún ê sìnn-miā
一家伙的願望
tsi̍t-ke-hué ê guān-bāng
戶橂矮矮三寸懸
hōo-tīng é-é sann-tshùn kuân
踏入門
ta̍h-ji̍p mn̂g
甜苦攏愛承擔
tinn-khóo lóng ài sîng-tam
只要你用心來疼痛
tsí-iàu lí iōng-sim lâi thiànn-thàng
就算獻出性命
tiō-sǹg hiàn tshut sìnn-miā
阮也心甘情願
gún iā sim kam tsîng guān
