快樂頌
《快樂頌》Khuài-lo̍k Siōng
陳怡婷Tân Î-tîng
——————————————
今仔日好天氣
kin-á-ji̍t hó thinn-khì
四界攏全是好風景
sì-kè lóng tsuân sī hó hong-kíng
毋免躊躇佮懷疑
m̄-bián tiû-tû kah huâi-gî
趁這个好日子
thàn tsit ê hó ji̍t-tsí
花開甲遮爾媠
hue khui kah tsiah-nī suí
太陽嘛對阮笑微微
thài-iông mā tuì gún tshiò bi-bi
春風送來的甜蜜
tshun-hong sàng–lâi ê tinn-bi̍t
猶閣有幸福的芳味
iáu-koh ū hīng-hok ê phang-bī
心花來放予開
sim-hue lâi pàng hōo khui
自然快樂來揣你
tsū-jiân khuài-lo̍k lâi tshuē lí
幸福就是簡單的代誌
hīng-hok tiō-sī kán-tan ê tāi-tsì
這首快樂的歌送予你
tsit siú khuài-lo̍k ê kua sàng hōo lí
陪伴你度過每一日
puê-phuānn lí tōo-kuè muí tsi̍t-ji̍t
當做有阮咧身邊
tòng-tsuè ū gún teh sin-pinn
逐工攏歡喜
ta̍k-kang lóng huann-hí
這首快樂的歌送予你
tsit siú khuài-lo̍k ê kua sàng hōo lí
陪伴你度過每一暝
puê-phuānn lí tōo-kuè muí tsi̍t-mî
煩惱暫時放袂記
huân-ló tsiām-sî pàng-buē-kì
未來的人生
bī-lâi ê jîn-sing
攏是幸運日
lóng-sī hīng-ūn ji̍t
