用愛守護
《用愛守護》Iōng Ài Siú-hōo
郭婷筠Kueh Tîng-ûn
——————————————
伊的夢飛袂振動
i ê bāng pue buē tín-tāng
伊面上失去笑容佮向望
i bīn-siōng sit-khì tshiò-iông kah ǹg-bāng
伊的願
i ê guān
是想欲趕緊來大漢
sī siūnn-beh kuánn-kín lâi tuā-hàn
會當免閣驚惶
ē-tàng bián koh kiann-hiânn
袂有惡夢
buē ū ok-bāng
看著伊帶著傷痕累累
khuànn-tio̍h i tuà tio̍h siong-hûn luí-luí
若是你敢會堪
nā-sī lí kám ē-kham
半暝聽著伊的哭聲
puànn-mî thiann-tio̍h i ê khàu-siann
敢袂毋甘
kám buē m̄-kam
用愛來守護所有囡仔平安
iōng ài lâi siú-hōo sóo-ū gín-á pîng-an
用愛來守護小小性命願望
iōng ài lâi siú-hōo sió-sió sìnn-miā guān-bāng
予伊快樂做著美夢
hōo i khuài-lo̍k tsuè tio̍h bí-bāng
天真笑容毋免偷藏
thian-tsin tshiò-iông m̄-bián thau tshàng
小小心房
sió-sió sim-pâng
袂閣茫茫
buē koh bâng-bâng
寶貝寶貝
pó-puè pó-puè
平安大漢
pîng-an tuā-hàn
