有光的時陣
《有光的時陣》Ū Kng ê Sî-tsūn
郭婷筠Kueh Tîng-ûn
——————————————
佇窗外有光的時陣
tī thang-guā ū kng ê sî-tsūn
佇亂鐘響起的時陣
tī luān-tsing hiáng-khí ê sî-tsūn
我擘開目睭
guá peh-khui ba̍k-tsiu
小可伸輪
sió-khuá tshun-lûn
綴著天邊的雲出門
tuè tio̍h thinn-pinn ê hûn tshut-mn̂g
真濟車來來去去的時陣
tsin tsè tshia lâi-lâi-khì-khì ê sî-tsūn
逐个人雄雄狂狂的時陣
ta̍k-ê lâng hiông-hiông-kông-kông ê sî-tsūn
是為啥咧追求
sī uī siánn teh tui-kiû
抑只是生存
ia̍h tsí-sī sing-tsûn
毋知家己應該按怎算
m̄-tsai ka-kī ing-kai án-tsuánn sǹg
慣勢撙節著分寸
kuàn-sì tsún-tsat tio̍h hun-tshùn
遵守著本份
tsun-siú tio̍h pún-hūn
慣勢堅強
kuàn-sì kian-kiông
慣勢吞忍
kuàn-sì thun-lún
想欲保持的單純
siūnn-beh pó-tshî ê tan-sûn
保護的靈魂
pó-hōo ê lîng-hûn
行到這陣毋知敢有賰
kiânn kàu tsit-tsūn m̄-tsai kám ū tshun
若是攏由在緣份
nā-sī lóng iû-tsāi iân-hūn
攏只是命運
lóng tsí-sī miā-ūn
揣一位予我的心安穩
tshuē tsi̍t-uī hōo guá ê sim an-ún
等待後一个有光的時陣
tán-thāi āu tsi̍t-ê ū kng ê sî-tsūn
會照散罩月的烏雲
ē tsiò-siànn tà gue̍h ê oo-hûn
—
等待後一个有光的時陣
tán-thāi āu tsi̍t-ê ū kng ê sî-tsūn
就是好原全的傷痕
tiō-sī hó guân-tsuân ê siong-hûn
