感受愛
《感受愛》Kám-siū Ài
郭婷筠Kueh Tîng-ûn
——————————————
手中的記持
tshiú-tiong ê kì-tî
有溫暖的芳味
ū un-luán ê phang-bī
但是我留袂牢
tān-sī guá lâu buē-tiâu
兩人永遠的春天
nn̄g-lâng íng-uán ê tshun-thinn
今夜又是月光圓
kim-iā iū sī gue̍h-kng înn
照入心肝的空喙
tsiò ji̍p sim-kuann ê khang-tshuì
鑿著愛阮的過去
tsha̍k-tio̍h ài gún ê kuè-khì
恬恬選擇來離開
tiām-tiām suán-ti̍k lâi lī-khui
失戀的滋味
sit-luân ê tsu-bī
是一杯烏咖啡
sī tsi̍t-pue oo-ka-pi
苦澀若吞落喉
khóo-siap nā thun lo̍h-âu
也有喙邊的甘甜
iā ū tshuì-pinn ê kam-tinn
一片落葉隨風去
tsi̍t-phìnn lo̍h-hio̍h suî hong khì
享受自由的空氣
hiáng-siū tsū-iû ê khong-khì
原來天頂的彼粒星
guân-lâi thinn-tíng ê hit lia̍p tshinn
猶原咧閃爍
iu-guân teh siám-sih
用心感受
iōng-sim kám-siū
溫暖的愛
un-luán ê ài
用心體會這世界
iōng-sim thé-huē tse sè-kài
身邊有幸福的存在
sin-pinn ū hīng-hok ê tsûn-tsāi
上溫柔的鼓勵
siōng un-jiû ê kóo-lē
上體貼的關懷
siōng thé-thiap ê kuan-huâi
珍惜付出的人
tin-sioh hù-tshut ê lâng
感謝予阮愛
kám-siā hōo gún ài
用心感受溫暖的愛
iōng-sim kám-siū un-luán ê ài
用心體會這世界
iōng-sim thé-huē tse sè-kài
迎接咱美麗的未來
gîng-tsiap lán bí-lē ê bī-lâi
換一个新角度
uānn tsi̍t-ê sin kak-tōo
看世事的精彩
khuànn sè-sū ê tsing-tshái
慢慢體會人生
bān-bān thé-huē jîn-sing
用心感受愛
iōng-sim kám-siū ài
