南光調
《南光調》Lâm-kong-tiāu
林夢梅Lîm Bāng-muî
——————————————
世間親像大戲臺
sè-kan tshin-tshiūnn tuā hì-tâi
苦齣笑詼攏公開
khóo-tshut tshiò-khue lóng kong-khai
一生一人演一擺
it-sing tsi̍t-lâng ián tsi̍t-pái
本事攏愛提出來
pún-sū lóng ài the̍h–tshut-lâi
世間過日像眠夢
sè-kan kuè-ji̍t tshiūnn bîn-bāng
苦濟甘少攏相仝
khóo tsuē kam tsió lóng sio-kāng
實在人無千日好
si̍t-tsāi lâng bô tshian-ji̍t hó
看來花無百日紅
khuànn–lâi hue bô pah-ji̍t âng
火佇咧當炎無偌久
hué tī-leh tng iām bô-guā-kú
火炭燒過變火烌
hué-thuànn sio–kuè piàn hé-hu
世間萬項大小事
sè-kan bān-hāng tuā-sió-sū
未曾想贏先想輸
buē-tsîng siūnn iânn sing siūnn su
