花佮女人
《花佮女人》Hue Kah Lú-jîn
田立安Tiân Li̍p-an
——————————————
茉莉開花白茫茫
ba̍k-nī khui-hue pe̍h-bâng-bâng
生做古錐又清芳
sinn-tsuè kóo-tsui iū tshing-phang
佮阮愛人真仝款
kah gún ài-jîn tsin kāng-khuán
莫怪我會遮迷戀
bo̍k-kuài guá ē tsiah bê-luân
玫瑰盛開真嬌媚
muî-kuì sīng-khui tsin kiau-bī
可惜暗中有帶刺
khó-sioh àm-tiong ū tài tshì
宛然煙花的女兒
uán-jiân ian-hue ê lú-jî
佮伊接近著注意
kah i tsiap-kūn tio̍h tsù-ì
杜鵑開花滿山紅
tōo-kuan khui-hue muá-suann âng
清風吹來輕搖動
tshing-hong tshue–lâi khin iô-tāng
較贏青春的紅顏
khah iânn tshing-tshun ê hông-gân
予人看著心輕鬆
hōo-lâng khuànn-tio̍h sim khin-sang
瓊花高貴若天仙
khîng-hue ko-kuì ná thian-sian
花蕊隨開隨時蔫
hue-luí suî khui suî-sî lian
袂輸少女的心性
buē-su siàu-lú ê sim-sìng
好歹予人分袂清
hó-pháinn hōo-lâng hun buē-tshing
菊花盛開在秋天
kiok-hue sīng-khui tsāi tshiu-thinn
毋驚霜風冷吱吱
m̄-kiann sng-hong líng-ki-ki
可比古早孟姜女
khó-pí kóo-tsá Bīng-khiunn-lí
為君千里送寒衣
uī kun tshian-lí sàng hân-i
梅花毋驚霜雪大
muî-hue m̄-kiann sng-seh tuā
較寒花蕊也袂謝
khah kuânn hue-luí iā buē siā
親像節女的心肝
tshin-tshiūnn tsiat-lú ê sim-kuann
忍受痛苦顧名聲
jím-siū thòng-khóo kòo miâ-siann
