為愛走唱
《為愛走唱》Uī Ài Tsáu-tshiùnn
吳俊宏Ngôo Tsùn-hông
——————————————
來到生份的所在
lâi-kàu sinn-hūn ê sóo-tsāi
出外頭一改
tshut-guā thâu tsi̍t-kái
風塵僕僕的塵埃
hong-tîn po̍k-po̍k ê tîn-ai
掩崁了目屎
am-khàm liáu ba̍k-sái
既然離開了心愛
kì-jiân lī-khui liáu sim-ài
毋通閣悲哀
m̄-thang koh pi-ai
男人的感慨
lâm-jîn ê kám-khài
啥人了解
siánn-lâng liáu-kái
一枝薰
tsi̍t-ki hun
一杯酒
tsi̍t-pue tsiú
是我貼心的朋友
sī guá tah-sim ê pîng-iú
燒酒溫暖阮身軀
sio-tsiú un-luán gún sin-khu
薰吐煙箍解千愁
hun thòo ian-khoo kái tshian-tshiû
捾著一跤舊皮箱
kuānn tio̍h tsi̍t-kha kū phuê-siunn
點一首最後的溫柔
tiám tsi̍t-siú tsuè-āu ê un-jiû
為情流浪他鄉
uī tsîng liû-lōng thann-hiong
繼續為愛走唱
kè-sio̍k uī ài tsáu-tshiùnn
