鼻儑不如鼻屎桶
《鼻儑不如鼻屎桶》Phīnn-gām Put-jû Phīnn Sái-tháng
楊小萍Iûnn Sió-phîng
——————————————
少年勸恁毋通鼻儑哎喲喂
siàu-liân khǹg lín m̄-thang phīnn-gām–ai-iō-uê
毋通鼻儑啊毋通鼻儑
m̄-thang phīnn-gām–ah m̄-thang phīnn-gām
鼻了若牢會知慘啊哎喲
phīnn liáu nā tiâu ē tsai tshám–ah aih-ioh
面黃黃
bīn n̂g-n̂g
目紅紅
ba̍k âng-âng
一个瘦甲毋像人
tsi̍t-ê sán kah m̄-tshiūnn lâng
哎喲!毋像人
aih-ioh! m̄-tshiūnn lâng
鼻儑的少年無希望哎喲喂
phīnn-gām ê siàu-liân bô hi-bāng–ai-iō-uê
無希望啊無希望
bô hi-bāng–ah bô hi-bāng
規日路邊咧遊動啊哎喲
kui-ji̍t lōo-pinn teh iû-tāng–ah aih-ioh
無欲讀冊
bô beh tha̍k-tsheh
無欲做工
bô beh tsuè-kang
頭楞楞毋知人
thâu gông-gông m̄-tsai-lâng
哎喲!毋知人
aih-ioh! m̄-tsai-lâng
爸母飼囝真困難哎喲喂
pē-bú tshī-kiánn tsin khùn-lân–ai-iō-uê
真困難啊真困難
tsin khùn-lân–ah tsin khùn-lân
辛苦將伊飼大漢啊哎喲
sin-khóo tsiong i tshī tuā-hàn–ah aih-ioh
好的毋學
hó–ê m̄ o̍h
學人鼻儑
o̍h lâng phīnn-gām
將伊飼大無彩工
tsiong i tshī-tuā bô-tshái-kang
哎喲!無彩工
aih-ioh! bô-tshái-kang
爸母囝兒愛疼痛哎喲喂
pē-bú kiánn-jî ài thiànn-thàng–ai-iō-uê
愛疼痛啊愛疼痛
ài thiànn-thàng–ah ài thiànn-thàng
毋通予伊交歹人啊哎喲
m̄-thang hōo i kau pháinn-lâng–ah aih-ioh
歹囝浪蕩
pháinn-kiánn lōng-tōng
亂亂摻
luān-luān tsham
將來害伊一世人
tsiong-lâi hāi i tsi̍t-sì-lâng
哎喲!一世人
aih-ioh! tsi̍t-sì-lâng
為了鼻儑關監房哎喲喂
uī-liáu phīnn-gām kuinn kann-pâng–ai-iō-uê
關監房啊關監房
kuinn kann-pâng–ah kuinn kann-pâng
爸母想著真怨嘆啊哎喲
pē-bú siūnn-tio̍h tsin uàn-thàn–ah aih-ioh
好好一个人
hó-hó tsi̍t-ê lâng
來鼻儑
lâi phīnn-gām
不如便所鼻屎桶
put-jû piān-sóo phīnn sái-tháng
哎喲!鼻屎桶
aih-ioh! phīnn sái-tháng
各位伸手相幫忙哎喲喂
kok-uī tshng-tshiú sio-pang-bâng–ai-iō-uê
相幫忙啊相幫忙
sio-pang-bâng–ah sio-pang-bâng
消滅社會的毒蟲啊哎喲
siau-bia̍t siā-huē ê to̍k-thâng–ah aih-ioh
白粉鴉片
pe̍h-hún a-phiàn
追煙鼻儑
tui-ian phīnn-gām
危害青年害死人
guî-hāi tshing-liân hāi-sí lâng
哎喲!害死人
aih-ioh! hāi-sí lâng
