請君保重
《請君保重》Tshiánn Kun Pó-tiōng
謝寶慧Siā Pó-huī
——————————————
你來提議欲分開
lí lâi thê-gī beh hun-khui
阮也毋敢反對
gún iā m̄-kánn huán-tuì
想欲留你在身邊
siūnn-beh lâu lí tsāi sin-pinn
已經啊猶是枉費
í-king–ah iáu-sī óng-huì
你講欲踏出社會
lí kóng beh ta̍h-tshut siā-huē
爭取好地位
tsing-tshú hó tē-uī
阮總愛現出笑容
gún tsóng ài hiàn-tshut tshiò-iông
忍疼送你來離開
jím-thiànn sàng lí lâi lī-khui
毋通袂記阮的叮嚀
m̄-thang buē-kì gún ê ting-lîng
早日回復咱做堆
tsá-ji̍t huê-ho̍k lán tsuè-tui
送你離開阮身邊
sàng lí lī-khui gún sin-pinn
算來是不得已
sǹg–lâi sī put-tit-í
相信你是為前程
siong-sìn lí sī uī tsiân-thîng
毋是你無情義
m̄-sī lí bô tsîng-gī
阮甘願為你
gún kam-guān uī lí
暫時忍耐心稀微
tsiām-sî jím-nāi sim hi-bî
你也著倚靠信心
lí iā tio̍h uá-khò sìn-sim
努力爭取著名字
lóo-li̍k tsing-tshú tio̍h miâ-jī
請你保重毋免掛念
tshiánn lí pó-tiōng m̄-bián khuà-liām
家鄉一切的代誌
ka-hiong it-tshè ê tāi-tsì
