彼條路
《彼條路》Hit Tiâu Lōo
許宗榮Khóo Tsong-îng
——————————————
冷冷的風
líng-líng ê hong
吹亂我漂浪的心
tshue-luān guá phiau-lōng ê sim
親像天頂的風吹
tshin-tshiūnn thinn-tíng ê hong-tshue
袂當家己落地
buē-tàng ka-kī lo̍h-tē
○○前程
?? tsiân-tîng
掩崁著來時的跤步
am-khàm tio̍h lâi-sî ê kha-pōo
予阮揣無轉去的路
hōo gún tshuē-bô tńg–khì ê lōo
苦澀的酒
khóo-siap ê tsiú
叫醒著我冰冷的情
kiò-tshínn tio̍h guá ping-líng ê tsîng
閃爍的燈火
siám-sih ê ting-hué
叫阮跤踏落地
kiò gún kha ta̍h lo̍h-tē
浮光掠影
hû-kong lio̍k-íng
映照著面前的美麗
ìng-tsiàu tio̍h bīn-tsîng ê bí-lē
毋知這一切
m̄-tsai tse it-tshè
是真是假
sī tsin sī ké
想著期待彼條路
siūnn-tio̍h kî-thāi hit tiâu lōo
是一條漫漫長路
sī tsi̍t-tiâu bān-bān tn̂g-lōo
踮佇故鄉的爸母
tiàm tī kòo-hiong ê pē-bú
毋知恁敢有好無
m̄-tsai lín kám ū hó–bô
望恁著愛看顧
bāng lín tio̍h-ài khuànn-kòo
期待著早日成功
kî-thāi tio̍h tsá-ji̍t sîng-kong
會當風光轉來
ē-tàng hong-kong tńg-lâi
看恁的驕傲笑容
khuànn lín ê kiau-ngōo tshiò-iông
