媽祖出巡
《媽祖出巡》Má-tsóo Tshut-sûn
陳玉鈴Tân Gio̍k-lîng
——————————————
媽祖娘娘咧出巡
Má-tsóo Niû-niû teh tshut-sûn
炮聲鼓聲響無停
phàu-siann kóo-siann hiáng bô-thîng
媽祖娘娘欲來出巡
Má-tsóo Niû-niû beh lâi tshut-sûn
千里順風兩將軍
Tshian-lí Sūn-hong lióng tsiong-kun
搖搖擺擺護神尊
iô-iô-pái-pái hōo sîn-tsun
善男信女
siān-lâm sìn-lú
手攑清香
tshiú gia̍h tshing-hiunn
祈求年年風調雨順
kî-kiû nî-nî hong tiâu ú sūn
國泰民安萬事興
kok-thài bîn-an bān-sū hing
家家戶戶好收成
ke-ke-hōo-hōo hó siu-sîng
天上聖母真正靈聖
Thian-siōng-sìng-bió tsin-tsiànn lîng-siànn
人人來求有感應
lâng-lâng lâi kiû ū kám-ìng
媽祖娘娘咧出巡
Má-tsóo Niû-niû teh tshut-sûn
八音鼓吹響無停
pat-im kóo-tshue hiáng bô-thîng
媽祖娘娘欲來出巡
Má-tsóo Niû-niû beh lâi tshut-sûn
也有弄龍佮弄獅
iā ū lāng-lîng kah lāng-sai
四方陣頭一直來
sù-hong tīn-thâu it-ti̍t lâi
善男信女
siān-lâm sìn-lú
相爭跪一擺
sio-tsinn kuī tsi̍t-pái
欲軁轎跤祈求好運來
beh nǹg kiō-kha kî-kiû hó-ūn lâi
家家戶戶鬧猜猜
ke-ke-hōo-hōo nāu-tshai-tshai
恭接媽祖欲出來
kiong-tsiap Má-tsóo beh tshut-lâi
天上聖母真正靈聖
Thian-siōng-sìng-bió tsin-tsiànn lîng-siànn
媽祖娘娘咧出巡
Má-tsóo Niû-niû teh tshut-sûn
