半屏山之戀
《半屏山之戀》Puànn-pîng-suann tsi luân
曾朝宗Tsan Tiâu-tsong
——————————————
半屏山
Puànn-pîng-suann
半屏山
Puànn-pîng-suann
阮彼个愛人仔辜負我
gún hit ê ài-jîn-á koo-hū guá
講阮貧惰也毋拍拚
kóng gún pîn-tuānn iā m̄ phah-piànn
全全痟話規大拖
tsuân-tsuân siáu-uē kui-tuā-thua
曷無想你愛虛華
ia̍h bô siūnn lí ài hi-hua
將阮放外外
tsiong gún pàng-guā-guā
為你賭氣來出外
uī lí tóo-khì lâi tshut-guā
被人陷害做鱸鰻
pī-lâng hām-hāi tsuè lôo-muâ
半屏山
Puànn-pîng-suann
半屏山
Puànn-pîng-suann
阮彼个姑娘仔離開我
gún hit ê koo-niû-á lī-khui guá
無想為伊日夜拍拚
bô siūnn uī i ji̍t-iā phah-piànn
佇咧佮人擔石沙
tī-teh kah lâng tann tsio̍h-sua
全無帶念竹篙跤
tsuân bô tài-liām tik-ko kha
向天咧咒誓
hiòng thinn teh tsiù-tsuā
叫阮怎袂心痛疼
kiò gún tsuánn buē sim thàng-thiànn
為你墜落烏暗城
uī lí tuī-lo̍h oo-àm-siânn
