做田人
《做田人》Tsuè-tshân-lâng
張恆銘Tiunn Hîng-bîng
——————————————
眼前的路歹行
gán-tsîng ê lōo pháinn-kiânn
規氣咱就褪赤跤
kui-khì lán tiō thǹg-tshiah-kha
無需要來借膽
bô-su-iàu lâi tsioh tánn
我有我的勇敢當做靠山
guá ū guá ê ióng-kám tòng-tsuè khò-suann
無需要來逃避
bô su-iàu lâi tô-pī
規氣咱就做伙行
kui-khì lán tiō tsò-hué kiânn
目睭若是入沙
ba̍k-tsiu nā sī ji̍p sua
咱有規陣兄弟當做靠山
lán ū kui-tīn hiann-tī tòng-tsuè khò-suann
看我
khuànn guá
擔起一擔驚惶
tann-khí tsi̍t-tànn kiann-hiânn
看破
khuànn-phuà
起起落落變卦
khí-khí-lo̍h-lo̍h piàn-kuà
雨愈大
hōo jú tuā
用盡氣力拍拚
iōng-tsīn khuì-la̍t phah-piànn
一步一跤行出
tsi̍t-pōo tsi̍t-kha kiânn-tshut
屬於咱的田岸
sio̍k-î lán ê tshân-huānn
—
把握時間
pá-ak sî-kan
莫閣拖磨
mài koh thua-buâ
用愛陪伴
iōng ài puê-phuānn
這是屬於咱的一工
tse sī sio̍k-î lán ê tsi̍t-kang
