紙燕仔
《紙燕仔》Tsuá-Ìnn-á
梓華Tsí-huâ
——————————————
飛入窗內的紙燕仔
pue ji̍p thang lāi ê tsuá-ìnn-á
溫柔的風是伊的伴
un-jiû ê hong sī i ê phuānn
拍開泛黃這張手紙
phah-khui huàn-n̂g tsit tiunn tshiú-tsuá
心悶煞來揣著我
sim-būn suah lâi tshuē-tio̍h guá
敢是過去的紙燕仔
kám-sī kuè-khì ê tsuá-ìnn-á
溫柔的字
un-jiû ê jī
攏是心疼
lóng-sī sim thiànn
想起較早不時依倚
siūnn-khí khah-tsá put-sî i-uá
幌韆鞦猶原孤單行
hàinn-tshian-tshiu iu-guân koo-tuann kiânn
田嬰寬寬仔綴
tshân-enn khuann-khuann-á tuè
微微仔風行
bî-bî-á hong kiânn
思念真拍拚歇佇心肝
su-liām tsin phah-piànn hioh tī sim-kuann
你敢閣會記
lí kám koh ē-kì
是啥物心情
sī siánn-mih sim-tsiânn
予彼張紙燕仔
hōo hit tiunn tsuá-ìnn-á
送阮做伴
sàng gún tsuè-phuānn
