童乩桌頭
《童乩桌頭》Tâng-ki Toh-thâu
牛車俥Gû-tshia Ki
——————————————
民間街頭真熱鬧
bîn-kan ke-thâu tsin jia̍t-nāu
童乩桌頭四界走
tâng-ki toh-thâu sì-kè tsáu
大小宮廟行透透
tuā-sió kiong-biō kiânn thàu-thàu
神威通北斗
sîn-ui thong pak-táu
正氣義魄厚
tsìng-khì gī-phik kāu
斬妖除魔
tsám-iau tû-môo
怹上𠢕
in siōng gâu
大德信士彼口灶
tāi-tik sìn-sū hit kháu tsàu
無風無搖厝頂漏
bô-hong bô-iô tshù-tíng lāu
三更暝半猴咬狗
sann-kinn mî-puànn kâu kā káu
陰風怪影亂操操
im-hong kuài-iánn luān tshau-tshau
三枝清香
sann-ki tshing-hiunn
呼請眾神到
hoo-tshiánn tsiòng-sîn kàu
哪吒太子
Lô-tshia Thài-tsú
火輪來押後
hué-lûn lâi ah-āu
童乩起駕
tâng-ki khí-kà
五寶直直操
ngóo-pó ti̍t-ti̍t tshau
呋哈呋哈呋哈
huh! hah! huh! hah! huh! hah!
降伏妖孽無理來取鬧
hâng-ho̍k iau-gia̍t bô-lí lâi tshú-nāu
桌頭祕方爐丹煉藥草
toh-thâu pì-hng lôo-tan liān io̍h-tsháu
一服二○安神兼治嗽
it ho̍k jī ○ an-sîn kiam tī-sàu
三魂七魄有驚無了了
sam-hûn tshit-phik ū kiann bô liáu-liáu
童乩跳甲汗那流
tâng-ki thiàu kah kuānn ná lâu
雄雄攑頭問桌頭
hiông-hiông gia̍h-thâu mn̄g toh-thâu
腹肚枵枵已中晝
pak-tóo iau-iau í tiong-tàu
敢無點心通止口
kám bô tiám-sim thang tsí kháu
桌頭看看咧直幌頭
toh-thâu khuànn-khuànn–eh ti̍t hàinn-thâu
童乩khām-kha嗽
tâng-ki khām-kha-sàu
無事退駕
bô-sū thuè-kà
緊來走啊
kín lâi tsáu–ah
咿~咿~咿~咿~
ih~ ih~ ih~ ih~
—
↓—(口白)—↓
喂~童乩桌頭
uê~ tâng-ki toh-thâu
無點心有紅包啦
bô tiám-sim ū âng-pau–lah
唅!毋較早講咧
hannh! m̄ khah-tsá kóng–leh
