永遠的浪漫
《永遠的浪漫》Íng-uán ê Lōng-bān
陳子賢Tân Tsú-hiân
——————————————
獨夜無伴冷風透心肝
to̍k-iā bô-phuānn líng-hong thàu sim-kuann
電影恬恬佇咧搬
tiān-iánn tiām-tiām tī-leh puann
窗外雨聲落甲遮孤單
thang-guā hōo-siann lo̍h kah tsiah koo-tuann
陪著寂寞咧唱歌
puê tio̍h tsi̍k-bo̍k teh tshiùnn-kua
透早咖啡猶原袂消化
thàu-tsá ka-pi iu-guân buē siau-huà
引阮想起著較早
ín gún siūnn-khí tio̍h khah-tsá
咱的相片囥佇手機仔
lán ê siòng-phìnn khǹg tī tshiú-ki-á
毋知你敢閣會毋甘我的心疼
m̄-tsai lí kám koh ē m̄-kam guá ê sim thiànn
我袂閣再予你感覺為難
guá buē koh-tsài hōo lí kám-kak uî-lân
著當做是我心甘情願
tio̍h tòng-tsò sī guá sim kam tsîng guān
想你是我暫時的歹習慣
siūnn lí sī guá tsiām-sî ê pháinn si̍p-kuàn
愛你永遠是浪漫
ài lí íng-uán sī lōng-bān
我袂閣像較早遐爾頇顢
guá buē koh tshiūnn khah-tsá hiah-nī han-bān
一个人嘛會當閣勇敢
tsi̍t-ê-lâng mā ē-tàng koh ióng-kám
懷念過去你予我的美滿
huâi-liām kuè-khì lí hōo guá ê bí-buán
愛你永遠是燦爛
ài lí íng-uán sī tshàn-lān
愛是永遠的浪漫
ài sī íng-uán ê lōng-bān
