拍拚少年兄
《拍拚少年兄》Phah-piànn Siàu-liân-hiann
蘇振華Soo Tsín-huâ(泉州)
——————————————
有人天未光
ū-lâng thinn buē kng
就去排攤
tiō khì pâi-thuann
看人燒酒閣啉袂煞
khuànn lâng sio-tsiú koh lim buē-suah
有人山珍海味
ū-lâng san-tin-hái-bī
食甲驚
tsia̍h kah kiann
看人一枝烏輪
khàunn lâng tsi̍t-ki oo-lián
兩个人食
nn̄g-ê lâng tsia̍h
仝款人
kāng-khuán lâng
(煞)無仝命
(suah) bô-kāng miā
過著好䆀
kuè tio̍h hó-bái
家己知影
ka-kī tsai-iánn
有人孤單
ū-lâng koo-tuann
坐佇豪車內底仔
tsē tī hô-tshia lāi-té–á
看人咧𤆬某囝
khuànn lâng tih tshuā bóo-kiánn
騎跤踏車
khiâ kha-ta̍h-tshia
人生親像搬電影
jîn-sing tshin-tshiūnn puann tiān-iánn
結局按怎
kiat-kiok án-tsuánn
家己寫
ka-kī siá
我會認真拍拚做好囝
guá ē jīn-tsin phah-piànn tsuè hó-kiánn
(欲成功)欲成功來予恁看
(beh sîng-kong) beh sîng-kong lâi hōo lín khuànn
勇敢的少年兄
ióng-kám ê siàu-liân-hiann
運命毋是天註定
ūn-miā m̄-sī thinn tsù-tiānn
有人出世
ū-lâng tshut-sì
就是好命囝
tiō-sī hó-miā-kiánn
咱愛一步一跤印起行
lán ài tsi̍t-pōo tsi̍t kha-ìn khí-kiânn
拍拚的少年兄
phah-piànn ê siàu-liân-hiann
英雄毋是出身定輸贏
ing-hiông m̄-sī tshut-sin tiānn su-iânn
我欲起大厝娶媠某駛豪車
guá beh khí tuā-tshù tshuā suí-bóo sái hô-tshia
相信天公一定徛佇咱遮
siong-sìn thinn-kong it-tīng khiā tī lán tsia
