心肝女兒
《心肝女兒》Sim-kuann Lú-jî
王俊傑Ông Tsùn-kia̍t
——————————————
你是媽媽心肝
lí sī má-mah sim-kuann
爸爸心肝
pá-pah sim-kuann
爸爸媽媽共你惜命命
pá-pah má-mah kā lí sioh-miā-miā
對你保護
tuì lí pó-hōo
將你來疼
tsiong lí lâi thiànn
煩惱喙焦
huân-ló tshuì-ta
敢有受風寒
kám ū siū hong-kuânn
望你會爬
bāng lí ē pê
趕緊會大
kuánn-kín ē tuā
望你趕緊開喙
bāng lí kuánn-kín khai-tshuì
叫一聲
kiò tsi̍t-siann
一聲媽媽
tsi̍t-siann má-mah
一聲爸爸
tsi̍t-siann pá-pah
四界攏是
sì-kè lóng-sī
咱歡喜的笑聲
lán huann-hí ê tshiò-siann
慢慢行
bān-bān kiânn
慢慢行
bān-bān kiânn
你是阮的幸福(心肝)查某囝
lí sī gún ê hīng-hok (sim-kuann) tsa-bóo-kiánn
毋免驚
m̄-bián kiann
毋免驚
m̄-bián kiann
爸爸媽媽佮你來做伴
pá-pah má-mah kah lí lâi tsuè-phuānn
你是阮的幸福查某囝
lí sī gún ê hīng-hok tsa-bóo-kiánn
上愛聽你可愛的笑聲
siōng ài thiann lí khó-ài ê tshiò-siann
心肝查某囝
sim-kuann tsa-bóo-kiánn
開喙緊叫一聲
khai-tshuì kín kiò tsi̍t-siann
媽媽爸爸
má-mah pá-pah
