後世人
《後世人》Āu-sì-lâng
曾瑋中Tsan Uí-tiong/Kuljelje
——————————————
自從你來離開
tsū-tsiông lí lâi lī-khui
已經幾若年
í-king kuí-lō nî
這段無你的日子
tsit tuānn bô lí ê ji̍t-tsí
我若像失去自己
guá ná-tshiūnn sit-khì tsū-kí
夢中等無你
bāng-tiong tán-bô lí
你到底去佗位
lí tàu-té khì tó-uī
生活敢有慣勢
sing-ua̍h kám ū kuàn-sì
敢知影我咧想你
kám tsai-iánn guá teh siūnn lí
原來思念太深
guân-lâi su-liām thài tshim
愈想欲表達
jú siūnn-beh piáu-ta̍t
煞揣無字
suah tshuē-bô jī
話若欲講透機
uē nā beh kóng thàu-ki
目屎是掰袂離
ba̍k-sái sī pué buē-lī
這條歌欲唱予你
tsit tiâu kua beh tshiùnn hōo lí
你敢有聽見
lí kám ū thiann–kìnn
囥佇心內的千言萬語
khǹg tī sim-lāi ê tshian-giân bān-gí
等到何時
tán-kàu hô-sî
有一工會出頭天
ū-tsi̍t-kang ē tshut-thâu-thinn
我答應你
guá tah-ìng lí
欠你的恩情大過天
khiàm lí ê un-tsîng tuā kuè thinn
向望後世人
ǹg-bāng āu-sì-lâng
才來沓沓仔還予你
tsiah lâi ta̍uh-ta̍uh-á hîng hōo lí
