慈母恩
《慈母恩》Tsû-bió Un
黃馨慧N̂g Hing-huī
——————————————
路邊的
lōo-pinn ê
路邊的雞母𤆬雞囝
lōo-pinn ê kue-bú tshuā kue-kiánn
母囝連心仝條命
bú-kiánn liân-sim kāng tiâu miā
媽媽為囝操身命
má-mah uī kiánn tshau sin-miā
含辛茹苦無怨聲
hâm-sin jû-khóo bô uàn-siann
做囝的人
tsuè-kiánn ê lâng
媽媽的話著愛聽
má-mah ê uē tio̍h-ài thiann
事業認真來拍拚
sū-gia̍p jīn-tsin lâi phah-piànn
盡心有孝做好囝
tsīn-sim iú-hàu tsuè hó-kiánn
致蔭媽媽來好命
tì-ìm má-mah lâi hó-miā
路邊的
lōo-pinn ê
路邊的雞母𤆬雞囝
lōo-pinn ê kue-bú tshuā kue-kiánn
母囝連心仝條命
bú-kiánn liân-sim kāng tiâu miā
媽媽為囝操身命
má-mah uī kiánn tshau sin-miā
受風受苦無怨聲
siū-hong siū-khóo bô uàn-siann
做囝的人
tsuè-kiánn ê lâng
養育之恩愛知影
ióng-io̍k tsi un ài tsai-iánn
事業認真來拍拚
sū-gia̍p jīn-tsin lâi phah-piànn
盡心有孝做好囝
tsīn-sim iú-hàu tsuè hó-kiánn
報答媽媽將咱晟
pò-tap má-mah tsiong lán tshiânn
