孝順歌
《孝順歌》Hàu-sūn Kua
林文隆Lîm Bûn-liông
——————————————
爸母生咱是咱生人
pē-bú sinn lán sī lán sinn lâng
親像稻秧仔來變稻欉
tshan-tshiūnn tiū-ng-á lâi piàn tiū-tsâng
爸母的恩情若無報
pē-bú ê un-tsîng nā bô pò
娶某生囝也無彩工
tshuā-bóo sinn-kiánn iā bô-tshái-kang
爸母疼咱是無條件
pē-bú thiànn lán sī bô tiâu-kiānn
親像油鋏咧照人影
tshan-tshiūnn iû-kiap teh tsiò lâng-iánn
彼號燈心寸寸總是愛
hit-lō ting-sim tshùn-tshùn tsóng sī ài
免予你暗路仔是來驚惶
bián hōo lí àm-lōo-á sī lâi kiann-hiânn
講到爸母的心肝哩
kóng kah pē-bú ê sim-kuann–lih
春來驚你寒
tshun lâi kiann lí kuânn
喔夏來驚你熱
ooh hā lâi kiann lí jua̍h
若是彼號秋天到囉
nā sī hit-lō tshiu-thinn kàu–looh
哎唷秋天到囉
aih-ioh tshiu-thinn kàu–looh
囝喂彼暗時仔睏
kiánn–uê he àm-sî-á khùn
你著蓋肚臍
lí tio̍h kah tōo-tsâi
若是彼號冬天到囉
nā sī hit-lō tang-thinn kàu–looh
哎唷冬天到囉
aih-ioh tang-thinn kàu–looh
囝喂彼出門著會記
kiánn–uê he tshut-mn̂g tio̍h ē-kì
會記穿彼領膨紗衫哩
ē-kì tshīng hit niá phòng-se-sann–lih
講到爸母的酸
kóng kah pē-bú ê sng
爸母的勞
pē-bú ê lô
上酸是生著不孝囝
siōng sng sī sinn tio̍h put-hàu-kiánn
上勞是囝的歹名聲
siōng lô sī kiánn ê pháinn miâ-siann
啊人人嘛咧講哩
ah lâng-lâng mā teh kóng–lih
彼天理輪迴
he thian-lí lûn-huê
善惡嘛有報
siān-ok mā iú pò
恐驚仔後日仔
khióng-kiann-á āu-ji̍t-á
拄著這號囝
tú-tio̍h tsit-lō kiánn
咱著趕緊哩
lán tio̍h kuánn-kín–lih
有孝爸母啊
iú-hàu pē-bú–ah
予伊快快樂樂
hōo i khuài-khuài-lo̍k-lo̍k
佮勇健健
kah ióng-kiānn-kiānn
爸母生咱是咱生人
pē-bú sinn lán sī lán sinn lâng
逆天逆地講是仙毋通喔
gi̍k thian gi̍k tē kóng sī sian m̄-thang–ooh
啊金錢地位是算啥物
ah kim tsînn tē-uī sī sǹg siánn-mih
啊有孝有義才會親像人
ah iú-hàu iú-gī tsiah ē tshan-tshiūnn–lâng
啊有孝有義才會親像人
ah iú-hàu iú-gī tsiah ē tshan-tshiūnn–lâng
