純情的初戀
《純情的初戀》Sûn-tsîng ê Tshoo-luân
甘奇靈Kam Kî-lîng
——————————————
啊~初戀的三月春天
ah~ tshoo-luân ê sann-ge̍h tshun-thinn
百花笑微微
pah-hue tshiò bî-bî
啊~咱兩人做陣散步
ah~ lán nn̄g-lâng tsuè-tīn sàn-pōo
青色的山邊
tshinn-sik ê suann-pinn
滿山的野花當開
muá-suann ê iá-hue tng khui
送來清爽的芳味
sàng lâi tshing-sóng ê phang-bī
流水的聲音親像
lâu-tsuí ê siann-im tshin-tshiūnn
替咱唱著戀歌詩
thè lán tshiùnn tio̍h luân-kua-si
啊~初戀的三月春天
ah~ tshoo-luân ê sann-ge̍h tshun-thinn
可愛初戀的春天
khó-ài tshoo-luân ê tshun-thinn
令人心迷醉
līng-lâng sim bê-tsuì
啊~初戀的八月秋天
ah~ tshoo-luân ê peh-gue̍h tshiu-thinn
月娘光微微
ge̍h-niû kng bî-bî
啊~咱兩人做陣散步
ah~ lán nn̄g-lâng tsuè-tīn sàn-pōo
藍色的海邊
nâ-sik ê hái-pinn
海面的大小波浪
hái-bīn ê tuā-sió pho-lōng
送來海風的野味
sàng lâi hái-hong ê iá-bī
加添著你我雙人
ka-thiam tio̍h lí guá siang-lâng
初戀愛情糖蜜甜
tshoo-luân ài-tsîng thn̂g-bi̍t-tinn
啊~純情的八月春天
ah~ sûn-tsîng ê peh-gue̍h tshun-thinn
可愛純情的秋天
khó-ài sûn-tsîng ê tshiu-thinn
令人心迷醉
līng-lâng sim bê-tsuì
