媽咪叫阮著嫁翁
《媽咪叫阮著嫁翁》Má-mih Kiò Gún Tio̍h Kè-ang
于林真Î Lîm-tsin
——————————————
媽咪叫阮著愛嫁翁
má-mih kiò gún tio̍h-ài kè-ang
阮毋知欲嫁啥款人
gún m̄-tsai beh kè siánn-khuán lâng
若想欲嫁一个緣投仔翁
nā siūnn-beh kè tsi̍t-ê iân-tâu-á ang
毋過驚伊予阮了戇工
m̄-koh kiann i hōo gún liáu-gōng-kang
若是嫁著彼號跋筊翁
nā sī kè tio̍h hit-lō pua̍h-kiáu ang
橐袋仔定定嘛空空空
lak-tē-á tiānn-tiānn mā kha̋ng-khang-khang
若是嫁著彼號貧惰翁
nā sī kè tio̍h hit-lō pîn-tuānn ang
米甕仔弄叮噹
bí-àng-á lāng tin-tang
啊若是嫁著彼號燒酒翁喔
ah nā sī kè tio̍h hit-lō sio-tsiú ang–ooh
半暝仔轉來
puànn-mî-á tńg–lâi
閣目睭激挩窗
koh ba̍k-tsiu kik thuah-thang
啊~欲嫁翁欲嫁翁
ah~ beh kè-ang beh kè-ang
欲嫁啥款人
beh kè siánn-khuán lâng
啊隔壁阿九姆仔
ah keh-piah A-káu-ḿ–á
佇咧講
tī-leh jiǎng
嫁翁著愛嫁忠厚人
kè-ang tio̍h-ài kè tiong-hōo-lâng
人講䆀䆀翁
lâng kóng bái-bái ang
永遠食袂空
íng-uán tsia̍h buē-khang
