女人四十一蕊花
《女人四十一蕊花》Lú-jîn Sì-tsa̍p Tsi̍t-luí Hue
張素綾Tiunn Sòo-lîng
——————————————
女人四十花一蕊
lú-jîn sì-tsa̍p hue tsi̍t-luí
芬芳滿室又閣媠
hun-hong muá-sik iū-koh suí
白有百合佮夜來香
pe̍h ū pah-ha̍p kah iā-lâi-hiong
芳有玫瑰佮四季紅
phang ū muî-kuì kah sù-kuì-hông
阮是一蕊紅雞髻
gún sī tsi̍t-luí âng ke-kuè
人講翁行某著綴
lâng kóng ang kiânn bóo tio̍h tuè
鹹酸苦澀願忍受
kiâm-sng khóo-siap guān jím-siū
天邊海角伴君遊
thinn-pinn hái-kak phuānn kun iû
女人四十花一蕊
lú-jîn sì-tsa̍p hue tsi̍t-luí
為家為君為囝開
uī ke uī kun uī kiánn khui
毋管日曝佮臘月風
m̄-kuán ji̍t pha̍k kah la̍h-ge̍h hong
忍著痛苦佮展笑容
jím tio̍h thòng-khóo kah tián tshiò-iông
阮是一蕊紅玫瑰
gún sī tsi̍t-luí âng muî-kuì
人講有刺袂食虧
lâng kóng ū tshì buē tsia̍h-khui
毋驚野蜂共阮弄
m̄-kiann iá-phang kā gún lāng
夫妻恩愛一世人
hu-tshe un-ài tsi̍t-sì-lâng
