三日的愛情
《三日的愛情》Sann-ji̍t ê Ài-tsîng
方瑞娥Png Suī-ngôo
——————————————
你的眼神
lí ê gán-sîn
射入我心靈
siā ji̍p guá sim-lîng
我的心醉甲看袂清
guá ê sim tsuì kah khuànn buē-tshing
你我攏無講明
lí guá lóng bô kóng-bîng
一直愛袂停
it-ti̍t ài buē-thîng
經過三日的愛情
king-kè sann-ji̍t ê ài-tsîng
毋知春天抑冬天
m̄-tsai tshun-thinn ia̍h tang-thinn
你的離開
lí ê lī-khui
回復我的平靜
huê-ho̍k guá ê pîng-tsīng
我的情猶原猶未冷
guá ê tsîng iu-guân iáu-buē líng
過去留予以前
kuè-khì lâu hōo í-tsîng
日子愈無閒
ji̍t-tsí jú bô-îng
三日的愛情
sann-ji̍t ê ài-tsîng
親像一齣痟戲
tshin-tshiūnn tsi̍t-tshut siáu-hì
做伙三日三暗暝
tsò-hué sann-ji̍t sann àm-mî
當做啥攏無發生
tòng-tsuè siánn lóng bô huat-sing
