求愛的條件
《求愛的條件》Kiû-ài ê Tiâu-kiānn
劉玉卿Lâu Gio̍k-khing
——————————————
你若有希望愛一个
lí nā ū hi-bāng ài tsi̍t-ê
會對你純情的男性
ē tuì lí sûn-tsîng ê lâm-sìng
第一步
tē-it pōo
態度愛正經
thāi-tōo ài tsìng-king
靠拍拚來創造好前程
khò phah-piànn lâi tshòng-tsō hó tsiân-tîng
雙人來快樂過著一生
siang-lâng lâi khuài-lo̍k kè tio̍h it-sing
來過一生
lâi kuè it-sing
才通來
tsiah thang lâi
才通來表明
tsiah thang lâi piáu-bîng
表明你真實的愛情
piáu-bîng lí tsin-si̍t ê ài-tsîng
真實的愛情
tsin-si̍t ê ài-tsîng
你若有希望愛一个
lí nā ū hi-bāng ài tsi̍t-ê
會對你專心的男性
ē tuì lí tsuan-sim ê lâm-sìng
第一步
tē-it pōo
心情愛鎮靜
sim-tsîng ài tìn-tsīng
毋通來欺騙人的感情
m̄-thang lâi khi-phiàn lâng ê kám-tsîng
做一个溫柔的女性啊
tsuè tsi̍t-ê un-jiû ê lú-sìng–ah
總會歡迎
tsóng ē huan-gîng
自然會
tsū-jiân ē
自然會完成
tsū-jiân ē uân-sîng
完成你甜蜜的愛情
uân-sîng lí tinn-bi̍t ê ài-tsîng
甜蜜的愛情
tinn-bi̍t ê ài-tsîng
你若有希望愛一个
lí nā ū hi-bāng ài tsi̍t-ê
會對你照顧的男性
ē tuì lí tsiàu-kòo ê lâm-sìng
第一步
tē-it pōo
眼光愛精明
gán-kong ài tsing-bîng
肯拍拚會忍耐歹環境
khíng phah-piànn ē jím-nāi pháinn khuân-kíng
比較著緣投較會來
pí-kàu tio̍h iân-tâu khah ē lâi
照顧你一生
tsiàu-kòo lí it-sing
趕緊來
kuánn-kín lâi
趕緊來進行
kuánn-kín lâi tsìn-hîng
進行你幸福的愛情
tsìn-hîng lí hīng-hok ê ài-tsîng
幸福的愛情
hīng-hok ê ài-tsîng
