我所愛的人
《我所愛的人》Guá Sóo Ài ê Lâng
楊華東Iûnn Huâ-tong (阿東)
梅家君Muî Ka-kun
——————————————
啊~我所愛的人
ah~ guá sóo ài ê lâng
所愛的人也就是
sóo ài ê lâng iā tsiū-sī
對面彼个阿婆的千金
tuì-bīn hit ê a-pô ê tshian-kim
生做瘦瘦嘛袂傷大箍
sinn-tsuè sán-sán mā bē siunn tuā-khoo
目睭重巡
ba̍k-tsiu tîng-sûn
雙爿酒窟
siang-pîng tsiú-khut
真正得人疼
tsin-tsiànn tik-lâng-thiànn
可惜皮膚較烏淡薄
khó-sioh phuê-hu khah oo–tām-po̍h
但是真𠢕妝
tān-sī tsin gâu tsng
我每日思念著伊
guá muí-ji̍t su-liām tio̍h i
毋敢對伊講起
m̄-kánn tuì i kóng-khí
我愛你我愛你
guá ài lí guá ài lí
↓↓(口白)—(口白)↓↓
欸!阿君仔喔
eh! A-kun–á ooh
咱盈暗閣來去看電影
lán îng-àm koh lâi-khì khuànn tiān-iánn
ＯＫ毋ＯＫ
OK m̄ OK
嗯~常在咧看電影
ngh~ siông-tsāi teh khuànn tiān-iánn
嘛無心適
mā bô sim-sik
↑↑(口白)—(口白)↑↑
嗯~我思慕的人
ngh~ guá su-bōo ê lâng
思慕的人也就是
su-bōo ê lâng iā tsiū-sī
對面彼个小妹怹兄哥
tuì-bīn hit ê sió-muē in hiann-ko
學問普通嘛英語會講
ha̍k-būn phóo-thong–mah Ing-gí ē kóng
伊是毋是生成古意
i sī-m̄-sī sinn-sîng kóo-ì
實在氣死人
si̍t-tsāi khì-sí lâng
若是愛阮
nā sī ài gún
應該嘛著對阮坦白講
ing-kai mā tio̍h tuì gún thán-pe̍h kóng
阮也是純情女性
gún iā-sī sûn-tsîng lú-sìng
毋敢對伊講起
m̄-kánn tuì i kóng-khí
嘛是I love you
mā sī I love you
↓↓(口白)—(口白)↓↓
欸!阿君仔喔
eh! A-kun–á ooh
抑無
ia̍h-bô
紲來去公園𨑨迌
suà lâi khì kong-hn̂g tshit-thô
好毋好咧
hó m̄-hó–leh
毋啦!
m̄–lah!
公園阮毋敢去
kong-hn̂g gún m̄-kánn khì
厝邊的人若知影
tshù-pinn ê lâng nā tsai-iánn
毋就歹勢甲
m̄-tō pháinn-sè kah
啊~毋免假歹勢啦
ah~ m̄-bián ké pháinn-sè–lah
咱煞毋欲來去較暗的所在呢
lán suah m̄ beh lâi khì khah àm ê sóo-tsāi–neh
↑↑(口白)—(口白)↑↑
欸~我所愛的人
eh~ guá sóo ài ê lâng
所愛的人若仙女
sóo ài ê lâng ná sian-lú
實在感謝阿婆真𠢕生
si̍t-tsāi kám-siā a-pô tsin gâu sinn
無所不至嘛引我相思
bû-sóo put-tsì–mah ín guá siunn-si
若是嫁阮
nā sī kè gún
我也一定真正疼惜伊
guá iā it-tīng tsin-tsiànn thiànn-sioh i
拄才對伊使目箭
tú-tsiah tuì i sái-ba̍k-tsìnn
伊嘛真歡喜
i mā tsin huann-hí
有一日我也決定
ū-tsi̍t-ji̍t guá iā kuat-tīng
會來對伊講起
ē lâi tuì i kóng-khí
我愛你我愛你
guá ài lí guá ài lí
