傷心碼頭
《傷心碼頭》Siong-sim Bé-thâu
楊烈Iûnn Lia̍t
——————————————
一个人孤孤單單
tsi̍t-ê-lâng koo-koo-tuann-tuann
來到傷心碼頭
lâi-kàu siong-sim bé-thâu
這條路冷冷清清
tsit tiâu lōo líng-líng-tshing-tshing
我為啥人等候
guá uī siánn-lâng tán-hāu
秋風蕭蕭
tshiu-hong siau-siau
吹落葉飄飄
tshue lo̍h hio̍h phiau-phiau
希望憂愁
hi-bāng iu-tshiû
隨風做陣飛走
suî hong tsuè-tīn pue-tsáu
一生中浮浮沉沉
it-sing tiòng phû-phû-tîm-tîm
甘願等你回頭
kam-guān tán lí huê-thâu
這世人茫茫渺渺
tsit-sì-lâng bông-bông-biáu-biáu
揣無生活目標
tshuē-bô sing-ua̍h bo̍k-phiau
苦苦等候
khóo-khóo tán-hāu
痴痴情未了
tshi-tshi tsîng bī-liáu
咱的感情
lán ê kám-tsîng
敢講一去無回頭
kám-kóng tsi̍t-khì bô huê-thâu
是你講
sī lí kóng
愛我愛到老
ài guá ài kah lāu
如今啥物也無留
jû-kim siánn-mih iā bô lâu
是你答應我
sī lí tah-ìng guá
轉來碼頭
tńg-lâi bé-thâu
用一生愛我也無夠
iōng it-sing ài guá iā bô-kàu
啊~傷心碼頭
ah~ siong-sim bé-thâu
往事明明放水流
óng-sū bîng-bîng pàng tsuí lâu
為何過去一幕一幕
uī-hô kuè-khì tsi̍t-bōo-tsi̍t-bōo
時時刻刻斷袂了
sî-sî-khik-khik tn̄g buē-liáu
啊~傷心碼頭
ah~ siong-sim bé-thâu
你的愛隨風吹走
lí ê ài suî hong tshue-tsáu
為何心酸一陣一陣
uī-hô sim-sng tsi̍t-tsūn-tsi̍t-tsūn
起起落落亂操操
khí-khí-lo̍h-lo̍h luān-tshau-tshau
