仝款的暗暝
《仝款的暗暝》Kāng-khuán ê Àm-mî
洪秀蘭Âng Siù-lân
——————————————
彼个離別的暗暝
hit ê lî-pia̍t ê àm-mî
雙人約束的月暝
siang-lâng iok-sok ê ge̍h-mî
你佮我永遠是
lí kah guá íng-uán sī
決心欲來做堆
kuat-sim beh lâi tsuè-tui
這款寂寞的日子
tsit khuán tsi̍k-bo̍k ê ji̍t-tsí
阮猶原是等待你
gún iu-guân sī tán-thāi lí
敢是我情難離
kám-sī guá tsîng lân-lî
袂當將你放予開
bē-tàng tsiong lí pàng hōo khui
是你的心肝
sī lí ê sim-kuann
已經變成冷
í-king piàn-sîng líng
無疑你我的戀情
bô-gî lí guá ê luân-tsîng
變夢境
piàn bāng-kíng
咱過去心甘情願的祕密
lán kuè-khì sim kam tsîng guān ê pì-bi̍t
如今變成無滋味
jû-kim piàn-sîng bô tsu-bī
你的聲音
lí ê siann-im
你的形影
lí ê hîng-iánn
已經消失去
í-king siau-sit–khì
怎樣咱的情份
tsuánn-iūnn lán ê tsîng-hūn
哪會袂當延落去
ná-ē bē-tàng iân–lo̍h-khì
你的無情佮阮離開
lí ê bô-tsîng kah gún lī-khui
到底為啥物
tàu-té uī-siánn-mih
愛情夢是空虛
ài-tsîng bāng sī khang-hi
仝款的暗暝
kāng-khuán ê àm-mî
想著我佮你
siūnn-tio̍h guá kah lí
予阮感覺真稀微
hōo gún kám-kak tsin hi-bî
仝款的暗暝
kāng-khuán ê àm-mî
雨水落袂離
hōo-tsuí lo̍h bē-lī
愛情夢到底是空虛
ài-tsîng bāng tàu-té sī khang-hi
