夜生活的人
《夜生活的人》Iā-sing-ua̍h ê Lâng
林清國Lîm Tshing-kok
——————————————
日頭漸漸咧落山
ji̍t-thâu tsiām-tsiām teh lo̍h-suann
又是一个鬧熱的夜生活
iū-sī tsi̍t-ê lāu-jia̍t ê iā-sing-ua̍h
攢好家私
tshuân-hó ke-si
這台兩光車
tsit tâi lióng-kong-tshia
來到夜市
lâi kàu iā-tshī
排著路邊擔仔
pâi tio̍h lōo-pinn-tànn-á
到處人聲
tò-tshù lâng-siann
佮音樂聲
kah im-ga̍k-siann
啥人會了解
siánn-lâng ē liáu-kái
我苦苦的心聲
guá khóo-khóo ê sim-siann
若毋是為著顧三頓
nā m̄-sī uī-tio̍h kòo-sann-tǹg
為著欲生活
uī-tio̍h beh sing-ua̍h
啥人甘願佮警察
siánn-lâng kam-guān kah kíng-tshat
走相掠佮開單
tsáu-sio-lia̍h kah khui-tuann
啊~暫時來度時機
ah~ tsiām-sî lâi tōo-sî-ki
啊~我會閣較拍拚
ah~ guá ē koh-khah phah-piànn
若有成功彼一日
nā ū sîng-kong hit-tsi̍t-ji̍t
就來離開
tiō lâi lī-khui
無奈的夜生活
bô-nāi ê iā-sing-ua̍h
