挲草歌
《挲草歌》So-tsháu Kua
黃三元N̂g Sam-guân
——————————————
透啊早起來啊
thàu–ah tsá khí-lâi–ah
是天啊漸光喔
sī thinn–ah tsiām kng–ooh
攑著鋤啊頭
gia̍h tio̍h tî–ah thâu
閣䞪啊䞪啊走
koh tshiàng–ah tshiàng–ah tsáu
走啊到哪田頭
tsáu–ah kàu–nah tshân thâu
閣喙咬薰吹斗
koh tshuì kā hun-tshue-táu
看著田啊園的草啊
khuànn-tio̍h tshân–ah hn̂g ê tsháu–ah
真啊厚
tsin–ah kāu
掘啊田溝嘛
ku̍t–ah tshân-kau–mah
田啊水流
tshân–ah tsuí lâu
田啊水若流焦
tshân–ah tsuí nā lâu ta
哎喲!欲來挲啊草
aih-ioh! bueh lâi so–ah tsháu
噢喔~頂坵啊挲了囉
oh-ooh~ tíng-khu–ah so liáu–loh
換來挲下坵啊喔
uānn lâi so ē-khu–ah-ooh
塗啊跤○去啊來
thôo-ahkha ? khì–ah lâi
是懸啊低啊爿喔
sī kuân–ah kē–ah pîng–ooh
跪啊落田底
kuī–ah lo̍h tshân-tué
閣田啊水冷
koh tshân–ah tsuí líng
頂啊爿若挲了嘛
tíng–ah pîng nā so liáu–mah
換來挲下爿
uānn lâi so ē-pîng
水啊雞吼聲閣kuak–ah kuak應
tsuí–ah ke háu-siann koh kuak–ah kuak ìng
日啊頭照著小山崙
ji̍t–ah thâu tsiò tio̍h sió suann-lūn
挲啊到田中央
so–ah kàu tshân tiong-ng
哎喲!田啊草啊長喔
aih-ioh! tshân–ah tsháu–ah tn̂g–ooh
噢喔~頂坵啊挲了囉
oh-ooh~ tíng-khu–ah so liáu–loh
換來挲下坵啊喔
uānn lâi so ē-khu–ah-ooh
大啊娘擔來啊
tuā–ah niû tann lâi–ah
是點啊心啊頓喔
sī tiám–ah sim–ah tǹg–ooh
叫阮逐家
kiò gún ta̍k-ke
都暫啊歇睏
to tsiām–ah hioh-khùn
看著哪阿娘仔
khuànn-tio̍h–nah a-niû-á
面抹水粉
bīn buah tsuí-hún
對啊阮講啊話
tuì–ah gún kóng–ah uē
閣笑啊文文
koh tshiò–ah bûn-bûn
鰗鰡看著
hôo-liu khuànn-tio̍h
閣爍爍顫
koh sih-sih tsùn
烏啊鶖叫著阮
oo–ah tshiu kiò tio̍h gún
哎喲!緊來歇睏喔
aih-ioh! kín lâi hioh-khùn–ooh
