花前嘆月
《花前嘆月》Hue Tsîng Thàn Gue̍h
藍茜Nâ-tshiàn
——————————————
一時方針掠無正
tsi̍t-sî hong-tsiam lia̍h bô-tsiànn
意志失落無心情
ì-tsì sit-lo̍h bô-sim-tsiânn
兩人哪當好是像鳥隻
nn̄g-lâng–nah tng hó sī tshiūnn tsiáu-tsiah
離開夢中是叫君名
lī-khui bāng-tiong sī kiò kun miâ
三日無想欲照鏡
sann-ji̍t bô siūnn-beh tsiò-kiànn
衫褲襤褸袂曉驚
sann khòo lâm-luí bē-hiáu kiann
四界哪揣無是哥跤跡
sì-kè–nah tshuē-bô sī ko kha-jiah
死活毋知是阮親兄
sí-ua̍h m̄-tsai sī guán tshin hiann
五更月娘移花影
gōo-kenn ge̍h-niû î hue-iánn
誤阮青春講誰聽
ngōo gún tshing-tshun kóng sáng thiann
六點哪日頭是上山嶺
la̍k-tiám–nah ji̍t-thâu sī tsiūnn suann-niá
陸續催阮是哭歹命
lio̍k-sio̍k tshui gún sī khàu pháinn-miā
七夕天河光映映
tshit-si̍k thian-hô kng iànn-iànn
拭起目屎看星行
tshit khí ba̍k-sái khuànn tshinn kiânn
八月哪十五是雨搧壁
peh-ge̍h–nah tsa̍p-gōo sī hōo siàn piah
扒破希望是嘆一聲
pê phuà hi-bōng sī thàn tsi̍t-siann
