純情夜曲
《純情夜曲》Sûn-tsîng Iā-khik
愛愛Ài-ài
——————————————
家中自嘆燈火遲
ke-tiong tsū-thàn ting-hé tî
君別家鄉已三年
kun pia̍t ka-hiong í sann-nî
恩愛一時來放離
un-ài tsi̍t-sî lâi pàng-lī
囝又細漢袂曉悲
kiánn iū suè-hàn buē-hiáu pi
↓↓(口白)—(口白)↓↓
哈!囝兒
hah! kiánn-jî
恁爸爸離開咱母囝
lín pá-pah lī-khui lán bú-kiánn
是有三年
sī ū sann-nî
這中間毋知咱母囝
tsit tiong-kan m̄-tsai lán bú-kiánn
咧過啥款的日子
teh kèr siánn-khuán ê ji̍t-tsí
囝你是細漢
kiánn lí sī suè-hàn
曷毋知媽媽為著你
ia̍h m̄-tsai má-mah uī-tio̍h lír
受了苦痛
siū liáu khóo-thàng
流了目屎
lâu liáu ba̍k-sái
咱哪會遮歹命咧
lán ná ē tsiah pháinn-miā–leh
毋知當時才會出頭的日子啊
m̄-tsai tang-sî tsiah ē tshut-thâu ê ji̍t-tsí–ah
↑↑(口白)—(口白)↑↑
寒風陣陣吹入來
hân-hong tsūn-tsūn tshe–ji̍p-lâi
桃花依舊照時開
thô-hua i-kū tsiàu-sî khai
無疑拆散咱恩愛
bô-gî thiah-suànn lán un-ài
看囝更加心悲哀
khuànn kiánn kìng-ka sim pi-ai
↓↓(口白)—(口白)↓↓
哈!神明
hah!sîn-bîng
你毋通來責罰著我的囝兒啦
lí m̄-thang lâi tsik-hua̍t tio̍h guá ê kiánn-jî–lah
伊是無罪過的囡仔
i sī bô tsuē-kò ê gín-á
若是我前世所註的運命
nā-sī guá tsîng-sè sóo tsù ê ūn-miā
你就責罰我一个
lí tō tsik-hua̍t guá tsi̍t-ê
千萬毋通予我的囝兒
tshian-bān m̄-thang hōo guá ê kiánn-jî
閣來受著這款的境遇啦
koh lâi siū-tio̍h tsit khuán ê kíng-gū–lah
↑↑(口白)—(口白)↑↑
傷心淚泉強欲滴
siong-sim lē-tsuânn kiōng-beh tih
淒風苦雨動心悲
tshe-hong khóo-ú tōng sim pi
囝你睏甲靜摺摺
kiánn lí khùn kah tsīng tsih-tsih
毋知媽媽苦三年
m̄-tsai má-mah khóo sann-nî
