爸爸的山
《爸爸的山》Pá-pah ê Suann
薛金顯Sih Kim-hián
——————————————
一个山崎
peh tsi̍t-ê suann-kiā
就是爸爸的山
tiō-sī pá-pah ê suann
花芳清風
hue-phang tshing-hong
對面來迎
tuì-bīn lâi ngiâ
攑頭一看
gia̍h-thâu tsi̍t-khuànn
水果滿滿
tsuí-kó muá-muá
也有鳥隻咧唱歌
iā ū tsiáu-tsiah teh tshiùnn-kua
啊~徛踮遠遠閣共看
ah~ khiā tiām hn̄g-hn̄g koh kā khuànn
壯觀尊嚴踮佇遐
tsòng-kuan tsun-giâm tiàm tī hia
遐是爸爸偝我的所在
hia sī pá-pah āinn guá ê sóo-tsāi
細漢的時
sè-hàn ê sî
天倫遊戲的樓臺
thian-lûn iû-hì ê lâu-tâi
遐有爸爸一生的期待
hia ū pá-pah it-sing ê kî-thāi
認真拍拚
jīn-tsin phah-piànn
希望創造好將來
hi-bāng tshòng-tsō hó tsiong-lâi
爸爸啊
pá-pah–ah
你晟阮養阮的偉大
lí tshiânn gún iúnn gún ê uí-tāi
就親像這座山
tiō tshin-tshiūnn tsit tsō suann
永遠存在
íng-uán tsûn-tsāi
存踮序細的心內
tsûn tiàm sī-sè ê sim-lāi
存踮囝兒的腦海
tsûn tiàm kiánn-jî ê náu-hái
每一工
muí tsi̍t-kang
就親像你佇厝內
tiō tshin-tshiūnn lí tī tshù-lāi
