毋通袂記
《毋通袂記》M̄-thang Buē-kì
蕭福德Siau Hok-tik
——————————————
佇復興北路的一間Hotel
tī Ho̍k-hing Pak-lōo ê tsi̍t-king Hotel
你我兩人
lí guá nn̄g-lâng
講出心內的痛苦
kóng tshut sim-lāi ê thòng-khóo
雖然你佮伊
sui-jiân lí kah i
做伙是真艱苦
tsò-hué sī tsin kan-khóo
你被逼轉去結婚
lí phuē pik tńg-khì kiat-hun
阮嘛是無法度
gún mā sī bô-huat-tōo
你到底是咧驚啥貨
lí tàu-té sī teh kiann siánn-huè
你是按怎著愛轉去佮伊陪
lí sī-án-tsuánn tio̍h-ài tńg-khì kah i puê
你何必著愛繼續按呢
lí hô-pit tio̍h-ài kè-sio̍k án-ne
目屎吞落腹肚底
ba̍k-sái thun lo̍h pak-tóo-té
明仔載的下晡
bîn-á-tsài ê ē-poo
你著愛坐火車轉去南部
lí tio̍h-ài tsē hué-tshia tńg-khì lâm-pōo
阮的心對你是放袂落
gún ê sim tuì lí sī pàng buē-lo̍h
毋通袂記
m̄-thang buē-kì
阮是永遠愛你
gún sī íng-uán ài lí
毋通袂記
m̄-thang buē-kì
咱兩个做伙彼段的日子
lán nn̄g-ê tsò-hué hit tuānn ê ji̍t-tsí
毋通袂記
m̄-thang buē-kì
阮會永遠等待你
gún ē íng-uán tán-thāi lí
等待何時何年
tán-thāi hô-sî hô-nî
閣來相見
koh lâi sann-kìnn
