啥人是英雄
《啥人是英雄》Siánn-lâng Sī Ing-hiông
蕭福德Siau Hok-tik
——————————————
有人故意欲閣提起
ū-lâng kòo-ì beh koh thê-khí
有人干焦欲放予袂記
ū-lâng kan-na beh pàng hōo buē-kì
只是為著
tsí-sī uī-tio̍h
騙人騙天騙家己
phiàn lâng phiàn thinn phiàn ka-kī
有人做夢是做袂醒
ū-lâng tsuè-bāng sī tsuè buē tshínn
有人真理是講一大堆
ū-lâng tsin-lí sī kóng tsi̍t-tuā-tui
嘛有人坐佇椅仔
mā ū-lâng tsē tī í-á
一坐就是幾若年
tsi̍t tsē tō-sī kuí-lō nî
啥物才是真情義理
siánn-mih tsiah-sī tsin-tsîng gī-lí
啥物才是真正的你
siánn-mih tsiah-sī tsin-tsiànn ê lí
你敢無關心
lí kám bô kuan-sim
你身邊發生的代誌
lí sin-pinn huat-sing ê tāi-tsì
英雄的跤跡
ing-hiông ê kha-jiah
咱的歷史從來攏無交代
lán ê li̍k-sú tsiông-lâi lóng bô kau-tài
啥人知影過去的
siánn-lâng tsai-iánn kuè-khì–ê
是好抑是䆀
sī hó ia̍h-sī bái
佇這个所在
tī tsit ê sóo-tsāi
咱已經過了幾若代
lán í-king kuè-liáu kuí-lō tāi
你是毋是真正想欲了解
lí sī-m̄-sī tsin-tsiànn siūnn-beh liáu-kái
阮是毋是真正無人愛
gún sī-m̄-sī tsin-tsiànn bô-lâng ài
何必等待別人關懷
hô-pit tán-thāi pa̍t-lâng kuan-huâi
到底英雄是啥人
tàu-té ing-hiông sī siánn-lâng
只有天公伯仔伊才會知
tsí-ū thinn-kong-peh–á i tshiah ē tsai
做伙鬥陣
tsò-hué tàu-tīn
只為後代
tsí uī hiō-tāi
