閩南查某
《閩南查某》Bín-lâm Tsa-bóo
沈朝成Sím Tiâu-sîng(泉州)
——————————————
閩南查某真正𠢕
Bín-lâm tsa-bóo tsin-tsiànn gâu
會做生理
ē tsuè-sing-lí
伊嘛顧厝內頭
i mā kòo tshù-lāi-thâu
強忍怹翁
kiông jím in ang
出去外面痟
tshut-khì guā-bīn siáu
心情袂爽啊
sim-tsîng buē sóng–ah
家己目屎流
ka-kī ba̍k-sái lâu
唱歌跳舞拋拋走
tshiùnn-kua thiàu-bú pha-pha-tsáu
逐項攏袂曉
ta̍k hāng lóng buē-hiáu
人情世事伊看透
jîn-tsîng-sè-sū i khuànn thàu
世界伊上巧
sè-kài i siōng khiáu
咱人一生只活一斗
lán-lâng it-sing tsí ua̍h tsi̍t-táu
朋友兄弟姊妹
pîng-iú hiann-tī-tsí-bē
比錢較重要
pí tsînn khah tiōng-iàu
厝邊頭尾
tshù-pinn-thâu-bé
啊毋免來計較
ah m̄-bián lâi kè-kàu
有錢無錢大家逍遙
ū-tsînn bô-tsînn tāi-ke siau-iâu
毋通予伊為咱吼
m̄-thang hōo i uî lán háu
