可憐的愛人
《可憐的愛人》Khó-liân ê Ài-jîn
西卿Se-khing
——————————————
昨暝踮在柳街巷
tsang-mî tiàm-tsāi liú-kue-hāng
忽然看著伊形影
hut-jiân khuànn-tio̍h i hîng-iánn
雖然一時來避開
sui-jiân tsi̍t-sî lâi phiah-khui
暗中叫著伊的名
àm-tiong kiò tio̍h i ê miâ
欲揣阮
beh tshuē gún
你怎樣流浪街巷
lí tsuánn-iūnn liû-lōng kue-hāng
亂亂直行
luān-luān ti̍t kiânn
希望你著
hi-bāng lí tio̍h
同情女性可憐環境
tông-tsîng lú-sìng khó-liân khuân-kíng
早一日心頭○○
tsá tsi̍t-ji̍t sim-thâu ? ?
暗淡路燈照街巷
àm-tām lōo-ting tsiò kue-hāng
陪伴著阮心憂悶
puê-phuānn tio̍h gún sim iu-būn
雖然月娘
sui-jiân ge̍h-niû
看輕阮抹著胭脂
khuànn-khin gún buah tio̍h ian-tsi
點喙脣
tiám tshuì-tûn
阮已經甘願來
gún í-king kam-guān lâi
看破愛情
khuànn-phuà ài-tsîng
放捒青春
pàng-sak tshing-tshun
犧牲一切
hi-sing it-tshè
為著伊的幸福將來
uī-tio̍h i ê hīng-hok tsiong-lâi
袂對著啥人議論
buē tuì tio̍h siánn-lâng gī-lūn
毋願踮在柳街巷
m̄-guān tiàm-tsāi liú-kue-hāng
予伊揣著阮一人
hōo i tshuē-tio̍h gún tsi̍t-lâng
雖然夜夜眠夢伊
sui-jiân iā-iā bîn-bāng i
兩人總愛分西東
nn̄g-lâng tsóng ài hun se-tang
離開著這條巷
lī-khui tio̍h tsit tiâu hāng
再揣人生淡薄希望
tsài tshuē jîn-sing tām-po̍h hi-bāng
今夜因何落著小雨
kim-iā in-hô lo̍h tio̍h sió-hōo
動人悲傷
tōng lâng pi-siong
跤步也感覺沉重
kha-pōo iā kám-kak tîm-tāng
