午夜洞簫浪子淚
《午夜洞簫浪子淚》Ngóo-iā Tōng-siau Lōng-tsú Luī
西卿Se-khing
——————————————
為著人情佮義理
uī-tio̍h jîn-tsîng kah gī-lí
離開了鄉里
lī-khui liáu hiunn-lí
一枝洞簫帶身邊
tsi̍t-ki tōng-siau tuà sin-pinn
吹出酸苦味
tshue tshut sng-khóo-bī
雖然目屎掛目墘
sui-jiân ba̍k-sái kuà ba̍k-kînn
毋敢滴出去
m̄-kánn tih–tshut-khì
忍耐一切的傷悲
jím-nāi it-tshè ê siong-pi
期待成功時
kî-thāi sîng-kong sî
做著男兒愛立志
tsuè tio̍h lâm-jî ài li̍p-tsì
哪通心空虛
ná thang sim khang-hi
一枝洞簫帶身邊
tsi̍t-ki tōng-siau tuà sin-pinn
伴阮過深更
phuānn gún kuè tshim-kinn
雖然滿腹的志氣
sui-jiân muá-pak ê tsì-khì
毋願心傷悲
m̄-guān sim siong-pi
午夜洞簫引起阮
ngóo-iā tōng-siau ín-khí gún
男子傷心淚
lâm-tsú siong-sim luī
流浪他鄉過日子
liû-lōng thann-hiong kuè ji̍t-tsí
時常想起你
sî-siông siūnn-khí lí
一枝洞簫帶身邊
tsi̍t-ki tōng-siau tuà sin-pinn
懷念彼當時
huâi-liām hit-tong-sî
雖然目前真落魄
sui-jiân ba̍k-tsîng tsin lo̍k-phik
毋願失志氣
m̄-guān sit-tsì khì
總有一工出頭天
tsóng ū-tsi̍t-kang tshut-thâu-thinn
佮你再團圓
kah lí tsài thuân-înn
