愛是犧牲
《愛是犧牲》Ài Sī Hi-sing
文鶯Bûn-ing
——————————————
啥物叫做真愛情
siánn-mih kiò-tsuè tsin ài-tsîng
阮雖然攏毋知
gún sui-jiân lóng m̄-tsai
毋過阮一把心火
m̄-koh gún tsi̍t-pé sim-hué
強欲燒起來
kiōng-beh sio–khí-lâi
到底是
tàu-tué sī
為著啥物原因
uī-tio̍h siánn-mih guân-in
阮也袂了解
gún iā buē liáu-kái
這敢是叫做愛情
tse kám-sī kiò-tsuè ài-tsîng
是毋是
sī-m̄-sī
阮嘛毋知
gún mā m̄-tsai
阮的心內愛慕你
gún ê sim-lāi ài-bōo lí
你敢會攏毋知
lí kám ē lóng m̄-tsai
為怎樣攏無對阮
uī-tsánn-iūnn lóng bô tuì gún
表示著情愛
piáu-sī tio̍h tsîng-ài
阮知影你有一个愛人
gún tsai-iánn lí ū tsi̍t-ê ài-jîn
踮在你心內
tiàm-tsāi lí sim-lāi
到現在閣再痴情
kàu hiān-tsāi koh-tsài tshi-tsîng
是毋是阮不應該
sī-m̄-sī gún put-ing-kai
為著愛情來犧牲
uī-tio̍h ài-tsîng lâi hi-sing
阮感覺真光榮
gún kám-kak tsin kong-îng
過去的美麗戀夢
kè-khì ê bí-lē luân-bāng
應該放予清
ing-kai pàng hōo tshing
毋免來暗暗佮人競爭
m̄-bián lâi àm-àm kah lâng kīng-tsing
心情袂安定
sim-tsîng buē an-tīng
阮甘願家己犧牲
gún kam-guān ka-kī hi-sing
是毋是你會分明
sī-m̄-sī lí ē hun-bîng
