往事何必想
《往事何必想》Óng-sū Hô-pit Siūnn
李芊慧Lí Tshian-huī
——————————————
毋是我欲愛風流
m̄-sī guá beh-ài hong-liû
貪戀跳舞佮啉酒
tham-luân thiàu-bú kah lim-tsiú
實在是為欲解憂愁
si̍t-tsāi sī uī-bueh kái iu-tshiû
孤不三終變這樣
koo-put sann-tsiong piàn tsit-iūnn
真濟知己好朋友
tsin tsuē ti-kí hó pîng-iú
勸我著愛會曉想
khǹg guá tio̍h-ài ē-hiáu siūnn
應該決心來看破
ing-kai kuat-sim lâi khuànn-phuà
彼一段痛苦的往事
hit tsi̍t-tuānn thòng-khóo ê óng-sū
提出著勇氣
the̍h tshut tio̍h ióng-khì
另外閣再去追求
līng-guā koh-tsài khì tui-kiû
毋通怪我無志氣
m̄-thang kuài guá bô tsì-khì
暝日較想也是伊
mî-ji̍t khah siūnn iā-sī i
實在是為愛來所致
si̍t-tsāi sī uī ài lâi sóo-tì
綿綿情絲斷袂離
mî-mî tsîng-si tn̄g buē-lī
真濟朋友咧講起
tsin tsuē pîng-iú teh kóng-khí
我的感情太幼稚
guá ê kám-tsîng thài iù-tī
既然兩人無緣份
kì-jiân nn̄g-lâng bô iân-hūn
應該著將伊放袂記
ing-kai tio̍h tsiong i pàng-buē-kì
提出著勇氣
the̍h tshut tio̍h ióng-khì
另外追求新伴侶
līng-guā tui-kiû sin phuānn-lī
