退色的情份
《退色的情份》Thè-sik ê Tsîng-hūn
小米Sió-bí
——————————————
天頂罩烏雲
thinn-tíng tà oo-hûn
手中一枝薰
tshiú-tiong tsi̍t-ki hun
時間一分一秒咧過
sî-kan tsi̍t-hun tsi̍t-bió teh kuè
漸漸退色的情份
tsiām-tsiām thè-sik ê tsîng-hūn
身邊只賰一枝薰
sin-pinn tsí tshun tsi̍t-ki hun
恬恬陪伴阮
tiām-tiām puê-phuānn gún
霜風冷雨
sng-hong líng-hōo
一陣閣一陣
tsi̍t-tsūn koh tsi̍t-tsūn
鑽入心肝心頭酸
tsǹg-ji̍p sim-kuann sim-thâu sng
薰煙永遠無做伴時陣
hun-ian íng-uán bô tsuè-phuānn sî-tsūn
這敢是仝款的命運
tse kám-sī kāng-khuán ê miā-ūn
日頭若落西山的黃昏
ji̍t-thâu nā lo̍h se-san ê hông-hun
有情的人無緣份
ū-tsîng ê lâng bô iân-hūn
情到深處有啥人問
tsîng kàu tshim-tshù ū siánn-lâng mn̄g
虛情假愛無分寸
hi-tsîng ké-ài bô hun-tshùn
所有一切的傷痕
sóo-ū it-tshè ê siong-hûn
只有自己啊
tsí-ū tsū-kí–ah
腹內吞
pak-lāi thun
