無翁飼囝
《無翁飼囝》Bô Ang Tshī Kiánn
吳石Ngôo Tsioh
——————————————
阮老爸
gún lāu-pē
留予怹某的批
lâu hōo in bóo ê phue
是一幅愛情上媠的畫
sī tsi̍t-pak ài-tsîng siōng suí ê uē
講好一生佮一世
kóng-hó it-sing kah it-sè
欲牽手好好行一回
beh khan-tshiú hó-hó kiânn tsi̍t-huê
所以才生阮這幾个
sóo-í tsiah senn gún tsit kuí ê
幫阿母鬥扞家
pang a-bú tàu huānn-ke
既然爸囝無緣來熟似
kì-jiân pē-kiánn bô-iân lâi si̍k-sāi
無時間通好來了解
bô sî-kan thang-hó lâi liáu-kái
歲月白了怹某的目眉
suè-gua̍t pe̍h liáu in bóo ê ba̍k-bâi
青春換目屎
tshing-tshun uānn ba̍k-sái
日拖磨
ji̍t thua-buâ
夜牽掛
iā khian-kuà
為著厝內的心頭肉
uī-tio̍h tshù-lāi ê sim-thâu-bah
用年華共性命來牽教
iōng liân-huâ kā sìnn-miā lâi khan-kà
一針一線紩美滿
tsi̍t-tsiam tsi̍t-suànn thīnn bí-muá
將阮兄弟姊妹晟養大
tsiong gún hiann-tī-tsí-muē tshiânn-ióng tuā
攑頭看阿母的頭毛
gia̍h-thâu khuànn a-bú ê thâu-mn̂g
變成白線
piàn-sîng pe̍h-suànn
也只有堅強的查某人
iā tsí-ū kian-kiông ê tsa-bóo-lâng
無翁敢飼囝
bô ang kánn tshī kiánn
